DC MANGOSONGO ATEMBELEA WANAFUNZI WALIODHURIKA NA RADI

Tarehe ya kuwekwa: February 23rd, 2024

Mapema leo tarehe 23 Februari  2024 Mkuu wa Wilaya ya Mbinga Mhe. Aziza Mangosongo ametembelea  Kituo cha Afya Kindimbachini kuwajulia hali wanafunzi 11 ambao wamejeruhiwa na radi tarehe 22 Februari  2024.

Sambamba na kuwatembelea majeruhi  hao Mangosongo  ameshiriki mazishi ya wanafunzi Maria Hyera(10) Alfons Hyera (8) kutoka shule ya msingi Mapendano pamoja na Deus Kayombo ( 8) kutoka Shule ya Msingi Kindimbachini ambao wamepoteza maisha kutokana na radi hiyo.

Aidha amekabidhi majeneza matatu na rambirambi  kwa wazazi wa marehemu pamoja na pole kwa majeruhi ambao wanaendelea kupata matibabu katika kituo cha  Afya Kindimbachini.

Ili kuhakikisha afya za majeruhi hao zinaimarika Mangosongo amemuagiza Mganga Mfawidhi wa Kituo cha Afya Kindimbachini kuwa huduma za afya kwa majeruhi hao zitolewe bure kwa kuzingatia ubora zaidi.

Akitoa salamu za pole  Kaimu Mkurugenzi wa Halmashauri ya Wilaya ya Mbinga Andrew Mbunda amemhakikishia Mkuu wa Wilaya kuwa  huduma za afya  zitatolewa kwa ubora  kama alivyoagiza.

Naye  Mganga Mfawidhi wa Kituo cha Afya Kindimbachini Dkt. Salum Bundala amebainisha kuwa kutoka na  kadhia hiyo wanafunzi 3 wamepoteza maisha, na wanafunzi 20 walijeruhiwa na kufikishwa kituoni hapo kwa ajili ya kupatiwa matibabu ambapo kati yao 9 wameruhusiwa na 11 wanaendelea na matibabu na hali zao zinaimarika.

Akielezea tukio  kwa upande wa shule ya Msingi Mapendano Mwalimu  Mkuu wa Shule hiyo  Danstan Hyera  amebainisha  kuwa  majira ya saa tisa alasiri radi ilipiga na  wanafunzi 21 walidhurika kati yao 19 walijeruhiwa  na wanafunzi 2 walipoteza maisha.

Kwa upande wake Bi. Anna Mkifaru  ambae ni mzazi wa moja ya majeruhi  amewashukuru watoa huduma wa Kituo cha Afya Kindimbachini kwa  huduma bora  zinazoendelea kutolewa kwa majeruhi hao ambao afya zao zinaendelea kuimarika.

Jumla ya Wanafunzi waliokubwa na kadhia hiyo ni 23,  wanafunzi 2 kutoka shule ya msingi Kindimbachini  na wanafunzi 21 kutoka Shule ya msingi Mapendano shule zilizopo  katika Halmashauri ya Wilaya ya Mbinga.

Imeandikwa na Silvia Ernest 

Kitengo cha Mawasiliano Serikalini 

23 Februari 2024