NBC KUANZA KUHUDUMIA WATUMISHI MBINGA DC

Tarehe ya kuwekwa: April 23rd, 2021

Benki na Taifa ya Biashara, NBC imeingia mkataba na Halmashauri ya Wilaya ya Mbinga wa makubaliano ya kutoa huduma za kifedha kwa watumishi wa Halmashauri hiyo.

Akizungumza kwenye kikao cha wawakilishi wa NBC na menejimenti ya Halmashauri ya Wilaya ya Mbinga kilichofanyika leo Aprili 23 Ofisini kwa Mkurugenzi Mtendaji Kiamili, Meneja Maendeleo ya Biashara wa benki ya NBC, Kelvin Kisyima amezungumzia juu ya huduma zinazotolewa na benki hiyo ikiwa ni pamoja na huduma za mikopo kwa watumishi, bima za aina zote, na akaunti mahsusi kwa wajasiriamali, wakulima na watumishi.

Jennifer Peter na Leonia Haule ambao ni maafisa Mikopo wa NBC wameongeza kuwa benki hiyo imetoa ofa na punguzo maalumu la riba kwa watumishi wa Halmashauri ya Wilaya ya Mbinga watakaochukua mikopo kupitia benki ya NBC na kwamba mikopo yote itatozwa riba ya 16% tu kwa mwaka, kiwango cha mkopo kikianzia Milioni 1 hadi Milioni 125 huku muda wa kurejesha ukiwa ni hadi miaka 6.

Benki ya NBC imewahakikishia watumishi wa Halmashauri ya Wilaya ya Mbinga kutoa huduma za kipekee, uwazi na utoaji wa huduma za akaunti zenye gharama nafuu za uendeshaji kwa kulinganisha na gharama zinazotolewa na taasisi nyingine za kifedha na kwamba huduma ya mkopo ni kwa watumishi wote hata wale ambao mishahara yao haipitii benki ya NBC.

Kwa upande wa Wakuu wa Idara na Vitengo waliopata nafasi ya kuuliza maswali na kutoa maoni yao waliomba benki hiyo kupanua huduma zake kwa kufungua tawi na kuongeza vituo vya kutolea huduma wilayani Mbinga huku Mkuu wa Idara ya Utumishi, Bw. Mfaume Cassim akitoa rai kwa benki hiyo kuzingatia utoaji wa huduma zake hasa za mikopo kwa watumishi wenye sifa na wanaostahili kwa mujibu wa kanuni, taratibu na miongozo iliyopo.

Bw. Kelvin Ksyima amefafanua kuwa kwa sasa benki ya NBC imeweka mkakati wa kuwafikia wateja kwa urahisi na kwamba kwa sasa huduma zote wilayani Mbinga zinapatikana kupitia Wakala Mkuu (Super Agent) lakini pia kupitia mawakala wadogo 7 waliopo Mbinga mjini na kueleza kuwa beniki hiyo ina mpango wa kuongeza wakala mwingine eneo la Kigonsera.

Kwa upande wake Mkurugenzi Mtendaji wa Halmashauri ya Wilaya ya Mbinga, Juma Mnwele, ameihakikishia benki ya NBC kuwa milango ipo wazi na kwamba Ofisi yake kupitia Wakuu wa Idara, Vitengo na Wakuu wa Vituo vya kazi inaahidi kutoa ushirikiano muda wowote ikiwemo kuthibitisha usahihi wa taarifa za watumishi wakati benki hiyo itakapohitaji kufanya uhakiki wa taarifa za watumishi watakaohitaji mikopo.

Imeandikwa na:

Salum Said

Afisa Habari

HALMASHAURI YA WILAYA YA MBINGA.  Aprili 23, 2021