MKURUGENZI MNWELE AAGA RASMI MBINGA

Tarehe ya kuwekwa: August 10th, 2021

Leo Agosti 10 yamefanyika makabidhiano ya Ofisi kati ya aliyekua Mkurugenzi Mtendaji wa Halmashauri ya Wilaya ya Mbinga, Juma Ally Mnwele na Mkurugenzi Mpya wa Halmashauri hiyo Juma Haji Juma kufuatia mabadiliko ya kiuongozi yaliyofanywa hivi karibuni na Rais wa Jamhuri ya Muungano wa Tanzania, Mhe. Samia Suluhu Hassan.

Tukio hilo la makabidhiano limefanyika makao makuu ya Halmashauri yaliyopo Kiamili na kuhudhuriwa na Wakuu wa Idara na Vitengo pamoja na Wajumbe wa Kamati ya Fedha, Uongozi na Mipango wakiongozwa na Mwenyekiti wa Halmashauri, Mhe. Desderius Haule.

Akizungumza wakati wa makabidhiano hayo Bw. Mnwele amewashukuru Wakuu wa Idara, Madiwani na watumishi wote wa Halmashauri ya Wilaya ya Mbinga kwa ushirikiano mkubwa alioupata kutoka kwao kwa kipindi chote cha miaka mitatu aliyofanya kazi Mbinga na kuwaomba kuendelea kutoa ushirikiano zaidi kwa Mkurugenzi Mpya.

Naye Mkurugenzi Haji ametumia nafasi hiyo kujitambulisha rasmi huku akihimiza ushirikiano na umoja katika utendaji kazi na kutoa msisitizo kwa kila mmoja kutumia taaluma, utashi na uwezo wake wote katika kuendelea kuwatumikia wananchi wa Mbinga na kuwaletea maendeleo.

Katika uteuzi wa Wakurugenzi uliofanya hivi karibuni na Mhe. Rais Bw. Juma Haji aliteuliwa kuwa Mkurugenzi mpya wa Halmashauri ya Wilaya ya Mbinga akichukua nafasi ya Bw. Juma Mnwele ambaye ameteuliwa na kuhamishiwa Manispaa ya Lindi kama Mkurugenzi Mpya wa Manispaa hiyo iliyopo Mkoani Lindi.

Ikumbukwe Juma Mnwele amehudumu kama Mkurugenzi Mtendaji wa Halmashauri ya Wilaya ya Mbinga kuanzia Agosti 2018 hadi mapema Agosti mwaka huu 2021, na kabla ya hapo alikua Mkurugenzi Mtendaji wa Halmashauri ya Wilaya ya Kibondo iliyopo Mkoani Kigoma kuanzia mwaka 2016 hadi 2018.

Imeandikwa na

Salum Said, Mbinga