NAIBU WAZIRI MAZINGIRA ATOA MAGIZO KWA MIGODI YA MAKAA YA MAWE MBINGA

Tarehe ya kuwekwa: July 13th, 2021

Naibu Waziri, Ofisi ya Makamu wa Rais Muungano na Mazingira, Mhe. Hamad Hassan Chande amezitaka kampuni za uchimbaji na uchakataji wa madini ya makaa ya mawe Wilayani Mbinga kuzingatia utunzaji na uhifadhi wa mazingira na kuweka kwenye vipaumbele vyao suala la afya na usalama wa jamii.

Mhe. Chande ametoa agizo hilo  leo Julai 13 wakati alipofanya ziara ya kutembelea migodi na bandari kavu za kuchakata na kuuzia madini ya makaa ya mawe zinazoendeshwa na kampuni za Tancoal na Ruvuma Coal  zilizopo kwenye vijiji vya Paradiso na Amanimakolo, wilayani Mbinga Mkoa wa Ruvuma

Akizungumza wakati wa ziara hiyo Naibu Waziri Chande amesema kuwa uwekezeaji wowote na shughuli nyingine za uchumi za kila siku ni muhimu zikazingatia utunzaji na uhifadhi wa mazingira.

"Dunia inakoelekea sasa ni uwekezaji pamoja na kuzingatia utunzaji wa mazingira, kwahiyo ni jambo la msingi sana shughuli za kiuchumi za kila siku ziwe zinazingatia mazingira kwani mazingira yetu ndio maisha yetu, na ndio uhai wetu"

Akizungumzia suala la vumbi ambalo imeelezwa kuwa ni kero kubwa kwa wananchi na jamii inayozunguka maeneo ya migodi na bandari kavu Mhe. Chande ameelekeza makampuni na madereva kuzingatia afya na usalama wa jamii hiyo kwa kuhakikisha wanafunika mkaa kila unaposafirishwa na kutoa onyo kali kwa wote watakaokikuka agizo hilo na kusema watachukuliwa hatua kali za kisheria.
"Tusingependa kuona watu wetu wanaathirika kwa sababu tu ya maendeleo ya kiuchumi yenye kuathiri afya na usalama wa jamii". Amesema Naibu Waziri huyo.

Vilevile Mhe. Chande ametoa rai kwa kampuni zote zinazochimba makaa ya mawe kuhakikisha  zinarejeshea hali ya ardhi, kuweka na kutekeleza programu ya upandaji miti ya kutosha kila mwaka pamoja na kulipa fidia watu wote wanaomiliki ardhi ndani ya maeneo ya leseni zao, ambapo ametoa miezi 6 kwa kampuni ya Ruvuma Coal kulipa wananchi wote wanaodai fidia ya ardhi kwenye eneo la mgodi wa Kampuni hiyo uliopo Kijiji cha Sara na Paradiso.

Imeandikwa na 

Salum Said,

Afisa Habari, Halmashauri ya Wilaya ya Mbinga.

Jumanne Julai 13, 2021