KAMATI YA FEDHA,UONGOZI NA MIPANGO YAMPONGEZA MKURUGENZI UTEKELEZAJI WA MIRADI

Tarehe ya kuwekwa: January 27th, 2024

Kamati ya Fedha, Uongozi na Mipango imempongeza Mkurugenzi wa Halmashauri  ya Wilaya ya Mbinga Juma Haji Juma  kwa kusimamia vizuri utekelezaji wa ujenzi ya miundombinu ya elimu inayotekelezwa katika Halmashauri  ya Wilaya ya Mbinga.

Kamati  imemtaka Mkurugenzi kuongeza kasi ya utekelezaji na kuzingatia thamani ya fedha ili miradi hiyo ikamilike kwa wakati na katika viwango vilivyokusudiwa.

Pongezi hizo zimetolewa na mwenyekiti wa Kamati hiyo ambae pia ni mwenyekiti wa Halmashauri  ya Wilaya ya Mbinga Mhe. Desderius Haule tarehe 26 Januari 2024 baada ya kamati hiyo kutembelea na kukagua ujenzi wa miundombinu ya elimu.

" Nikupongeze sana Mkurugenzi na wataalamu wako kwa simamia vizuri utekelezaji wa miradi hii, endeleza ari hiyo ili hii Halmashauri  iwe mfano wa kuigwa  kwa Halmashauri nyingine nchini" Amebainisha Mhe. Haule.

Kwa upande wake Mbunge wa Jimbo la Mbinga Vijijini Mhe. Benaya Kapinga amewataka wananchi wa Halmashauri  ya Wilaya ya Mbinga kujitolea na kushirikiana na Serikali katika utekelezaji wa miradi ya maendeleo.

Amebainisha kuwa Serikali inaleta fedha ili zitumike katika kutekeleza miradi ya maendeleo ambayo itakwenda kuleta maendeleo endelevu kwa wananchi hivyo ushiriki wa  jamii ni muhimu sana  katika kutimiza azma hiyo.

Kwa upande wake Kaimu  Mkurugenzi wa Halmashauri ya Wilaya ya Mbinga Andrew Mbunda ameihakikishia Kamati hiyo kuwa Halmashauri itaendelea kushirikiana na jamii katika kuhakikisha miradi hiyo inakamilika  kwa wakati na kwa ubora.

Kamati ya Fedha, Uongozi na Mipango imetembelea na kukagua ujenzi wa nyumba ya mwalimu shule ya Msingi Juhudi, ujenzi wa madarasa matatu na ofisi shule ya msingi Lupilinga pamoja na ujenzi wa shule mpya ya Sekondari Kitumbalomo.

Imeandikwa na Silvia Ernest 

Kitengo cha Mawasiliano Serikalini,

26 Januari 2024