KAMATI YA SIASA RUVUMA YARIDHISHWA NA MIRADI MBINGA DC

Tarehe ya kuwekwa: October 10th, 2023

Na Silvia Ernest

Kamati ya Siasa Mkoa wa Ruvuma imeridhishwa na  utekelezeaji wa miradi ya maendeleo inayotekelezwa katika Halmashauri ya Wilaya ya Mbinga.

Imemtaka Mkurugenzi wa Halmashauri  ya Wilaya ya Mbinga kuongeza kasi katika utekelezaji huo  ili  miradi hiyo ikamilike  kwa wakati na kuleta tija kwa wananchi.

Hayo yamebainishwa  Oktoba 10, 2023 na Katibu wa Chama cha Mapinduzi (CCM) Mkoa wa  Ruvuma  Ndg. Mohamed Ally  katika ziara ya Kamati ya Siasa Mkoa wa Ruvuma iliyolenga kukagua utekelezaji wa miradi ya maendeleo Halmashauri ya Wilaya ya Mbinga.

" Tumetembelea miradi na tumeona utekelezaji wake, Mkurugenzi endeleza ari hiyo ili miradi hii itekelezwe katika  ubora na viwango tarajiwa" Amesema Ndg. Ally

Pamoja na pongezi hizo  amewashukuru wananchi wa Kata ya Kipapa  kwa kuona haja na  kutoa eneo lenye ukubwa wa ekari 5 na nusu kwaajili ya ujenzi wa shule mpya ya Msingi Kilango.

Kwa upande wake Mwenyekiti wa  Chama cha Mapinduzi Wilaya ya Mbinga Mhe. Joseph Mdaka  amemshukuru Rais wa Jamhuri ya Muungano wa Tanzania Mhe. Samia Suluhu Hassan kwa kutenga fedha kwaajili ya utekelezaji wa miradi ya maendeleo katika Halmashauri  ya Wilaya ya Mbinga.

" Kipekee sana nimshukuru Mhe. Rais wetu  kwa kutuona wana Mbinga na kutuletea fedha kwaajili ya utekelezaji wa miradi hii tunashukuru sana" Amebainisha