KANAL LABAN AWATAKA WANANCHI WA KIPAPA KUSHIRIKI KATIKA UTEKELEZAJI WA MIRADI

Tarehe ya kuwekwa: July 4th, 2023

Mkuu wa Mkoa wa Ruvuma  Kanal Laban Thomas  amewataka wananchi wa Kata ya  Kipapa kushirikiana na Serikali katika utekelezaji wa miradi ya maendeleo ili  kuimarisha ulinzi wa vifaa vya ujenzi pamoja na kuhakikisha  miradi  hiyo inatekelezwa katika ubora na viwango  vinavyohitajika.

"Ni wajibu  wa kila Mtanzania kushirikiana  na Serikali katika utekelezaji wa miradi ya maendeleo  kuna wengine wanaiba  vifaa vya ujenzi  tunajikomoa sisi wenyewe na sio watu wengine  tusimamie miradi kwa pamoja tusiwaachie wataalam pekee yao" Amebainisha  Kanal Laban

Mhe. Mkuu wa Mkoa ametoa wito huo  4 Julai 2023  katika ziara yake ya kukagua utekelezaji  wa  ujenzi wa Shule  mpya ya Msingi inayojengwa katika Kata ya Kipapa iliyopo katika Halmashauri ya Wilaya ya Mbinga.

 Amekagua ujenzi wa  vyumba vya madarasa 9 , ujenzi wa matundu ya vyoo 18  pamoja na  ujenzi wa jengo la Utawala, ujenzi huo  unaotekelezwa  kupitia  Mradi wa BOOST.

Pamoja na rai hiyo  Mhe. Mkuu wa Mkoa amemshauri Mkurugenzi  wa Halmashauri  ya Wilaya ya Mbinga kutowapa kazi ya  ujenzi  mafundi wenyeji  ambao  sio waminifu katika utekelezaji wa miradi ya maendeleo akisisitiza kuwa  lengo la Serikali ni kuona  fedha inayotolewa inaendana na utekelezaji wa miradi.

" Mkurugenzi  usimpe  mradi  fundi ambae  hatekelezi vizuri miradi,  Serikali ilileta  utaratibu  mzuri sana wa kujenga kwa kutumia  mafundi wenyeji  tulionao katika maeneo yetu  lakini kuna baadhi ya mafundi hao sio waaminifu wanaharibu miradi

Hatuwezi kukubali kwasababu tu ni  kijana wa maeneo yetu  basi  atuharibie miradi yetu  miradi inaharibiwa kwa sababu tu tunahafamiana" Amesisitiza Kanal Laban

Kwa upande wake Mkuu wa Wilaya ya Mbinga Mhe. Aziza Mangosongo  amemhakikishia  Mhe. Mkuu wa Mkoa  kuwa maagizo yote yaliyotolewa yatafanyiwa kazi ili  utekelezaji wa ujenzi  huo  ukamilike kwa wakati na katika  ubora.