MAAGIZO YA MKURUGENZI KASHUSHURA KWA WATENDAJI WA VIJIJI

Tarehe ya kuwekwa: July 4th, 2024

Na Silvia Ernest

Mkurugenzi Mtendaji  Halmashauri ya Wilaya ya Mbinga  Joseph Kashushura  amewataka watendaji wa Vijiji  kuhakikisha fedha zote zinazokusanywa katika maeneo yao  zinapelekwa benki  ili kuondoa mianya ya   upotevu wa fedha  unaosababishwa na matumizi ya fedha mbichi.

Mkurugenzi  Kashushura  ametoa  agizo hilo katika kikao chake na Watendaji wa Vijiji kilichofanyika katika ukumbi wa mikutano  uliopo katika Ofisi za Halmashauri ya Wilaya ya Mbinga   tarehe 4  Julai 2024.

“Fedha zote zinazokusanywa zipelekwe benki  ili zitumike kwa utaratibu sio unakusanya tu fedha unaanza kutumia bila kufuata utaratibu  hii haipo sawa na yeyote atakae bainika atachukuliwa hatua ” Amesisitiza  Mkurugenzi Kashushura

Sambamba na hilo amewataka kusimamia ukusanyaji wa mapato  pamoja na kutambua  vyanzo  vyote vya mapato vilivyopo katika maeneo yao  ili fedha hiyo itumike katika  ktekeleza  miradi ya maendeleo.

Aidha amewataka watendaji hao  kuwa na utaratibu wa kusikiliza kero za wananchi  na kusisitiza kuwa  hataki  kusikia wananchi  wanapoteza muda wao  kuja Makao makuu ya Halmashauri  kuwasilisha kero zao ambazo zingetatuliwa  katika ngazi ya Kijiji.

 Vilevile Mkurugenzi Kashushura  amewataka viongozi hao kuhakikisha wanasimamia miradi ya maendeleo katika maeneo yao ikiwa ni moja ya  majukumu yao katika kuhakikisha  utekelezaji unaofanywa na Serikali unaleta tija kwa wananchi.

Pia ameendelea kuwasisitiza  viongozi hao kusoma  taarifa za mapato na matumizi ya Kijiji  ili kuleta uwazi na uelewa kwa wananchi wa  makusanyo na matumizi wa  fedha katika kutekeleza shughuli  za Serikali.