MBINGA DC MBIONI KUANZISHA LIGI YA MPIRA WA MIGUU YA HALMASHAURI

Tarehe ya kuwekwa: June 4th, 2023

Mkurugenzi Mtendaji wa Halmashauri ya Wilaya ya Mbinga Juma Haji Juma ametoa ahadi ya kuanzisha Ligi ya Mpira wa Miguu itakayoshirikisha Kata zote 29 za Halmashauri hiyo. 

Mkurugenzi Juma amebainisha mipango hiyo wakati wa ufunguzi rasmi wa mashindano ya mpira wa miguu ya MAMA MLIGO SUPER CUP yanayoendelea kwenye uwanja wa Shule ya Msingi Matiri ambapo Mkurugenzi huyo alialikwa kama Mgeni Rasmi Jumapili Juni 4, 2023.

Bw. Juma Haji Juma ameupongeza uongozi wa Kata ya Matiri na wadau wote walioandaa, kuratibu na hatimaye kuwezesha kufanyika kwa mashindano hayo yanayoshirikisha jumla ya timu 14 kutoka kata 6 za tarafa ya Kigonsera na Tarafa ya Mkumbi.

Aidha katika kuunga mkono jitihada hizo  Mkurugenzi Juma ametoa jezi seti mbili (2) na mipira mitatu (3) huku akitoa wito kwa jamii kuchangamkia na kushiriki kikamilifu kwenye michezo kwani ni muhimu kwa afya lakini pia ni ajira.

Meechi ya ufunguzi wa ligi hiyo iliyochezwa kwenye uwanja wa Shule ya Msingi Matiri iliisha kwa wenyeji Home Boys kutoka Matiri kuibuka kidedea kwa kuwachakaza Mhongozi FC ya Mhongozi goli 2 kwa 1.