MBINGA DC YAENDELEA KUTEKELEZA AGIZO LA UPANDAJI MITI

Tarehe ya kuwekwa: October 10th, 2023

Na Silvia Ernest

Halmashauri  ya Wilaya ya Mbinga imeendelea kutekeleza agizo la kampeni ya Kitaifa  juu ya upandaji wa miti 1, 500,000  kwa mwaka kwa kila Wilaya nchini.

Kaimu Mkuu wa Kitengo cha  Maliasili na Mazingira  Bw. Chrispine Haonga amebainisha  kuwa  pamoja na jitihada za uhifadhi wa Mazingira, Halmashauri  ya Wilaya ya Mbinga  imeotesha miche ya miti  mbalimbali katika kitalu cha miti cha Mpapa kwa ajili ya  matunda,mbao,dawa pamoja na  vyanzo vya Maji

Akielezea  baadhi  miche iliyopo, Haonga amesema kuna miche ya  Msindano, Msederela  ambao hutumika kwa mbao, Myenda ambao ni chanzo cha maji na mbao, Mbatabata ambao ni dawa, Mzambarau,Msambia na Karanga laini  wenye faida ya matunda.

Aidha ametoa wito kwa wananchi wa Halmashauri ya Wilaya ya Mbinga kupanda miti katika maeneo yao ili kunufaika na miti hiyo hususani katika kutunza mazingira  pamoja na kukuza uchumi.

Mwisho ametoa wito kwa wananchi wote  kuilinda misitu na uoto asili dhidi ya moto na uanzishaji holela wa shughuli za kibinadamu.

Amesema "Serikali inasisitiza katika upandaji miti katika maeneo yetu, hii ni faida kubwa sana katika Halmashauri  yetu tutapata faida ya dawa, matunda lakini pia itasaidia katika kukuza uchumi wetu hasa katika miti ya mbao"