MBINGA DC YAFIKIA LENGO UTOAJI WA KINGA TIBA ZA USUBI

Tarehe ya kuwekwa: August 28th, 2023

Na Silvia Ernest, Mbinga DC

Halmashauri ya Wilaya ya Mbinga imefikia  lengo la utoaji dawa  za Kinga tiba za Usubi kwa  kuwafikia wananchi 229, 414 sawa na 100. 4%  ukilinganisha na mwaka 2022  ambapo zoezi hili lilifanikiwa kwa 84%.

Kwa mwaka 2023  zoezi  la utoaji  dawa za Kinga  tiba  katika ngazi ya jamii  lililenga kuwafikia  wananchi 228,466 waishio katika viunga vya Halmashauri ya Wilaya ya Mbinga.

Kaimu  Mkuu wa  Idara ya huduma za Afya, Lishe na Ustawi wa Jamii  Halmashauri ya Wilaya ya Mbinga Dkt. Amad Mwalukungu ameeleza kuwa  mafanikio hayo yametokana na muitikio mkubwa wa wananchi baada ya kupatiwa elimu juu ya  faida ya dawa za Kinga tiba za Usubi.

"  Tumefikia  lengo  tulilojiwekea ,  na kabla ya yote tulitoa elimu ya kutosha na hii imesaidia  sana wananchi kujitokeza na kumeza dawa" Amebainisha Mwalukunga

Amefafanua kuwa zoezi hili la utoaji  wa dawa za Kinga tiba za Usubi  lilitekelezwa kwa siku saba kuanzia  tarehe 17 hadi 23 mwezi Agosti  katika  Kata 29  za Halmashauri ya Wilaya ya Mbinga.

Kwa upande wake Mratibu wa magonjwa  yaliyokuwa hayapewi kipaumbele  Dkt. Joseph Washa Washa amebainisha kuwa zoezi hili liliratibiwa kwa kuwafuata wananchi katika Kaya zao ( nyumba kwa nyumba), hatua hii imewapunguzia gharama wananchi na kuwaondolea usumbufu wa kwenda katika vituo vya afya kupata huduma.

Amefafanua  zaidi kuwa  ukilinganisha na mwaka huu mwaka jana  kulikuwa changamoto mbalimbali  kutoka kwa wananchi ambazo zilipelekea malengo kutotimia.

" Changamoto tulizokumbana nazo  kwa mwaka jana ni pamoja na wananchi kuwa na hofu juu ya hizi dawa lakini pia baadhi ya wanajamii kuwafukuza  watoa huduma waliokuwa wanapita katika Kaya zao

Baada ya kubaini changamoto hizo tumezifanyia kazi kwa kutoa elimu ya kutosha kwa wananchi ndio maana mwaka huu tumefikia lengo" Ameeleza Washa Washa