MBINGA DC YAPONGEZWA UTEKELEZAJI WA MIRADI

Tarehe ya kuwekwa: May 29th, 2024

MBINGA  DC YAPONGEZWA UTEKELEZAJI  WA MIRADI

Na Silvia Ernest

Mkuu wa Mkoa wa Ruvuma  Kanali Ahmed Abbas  amempongeza Mkurugenzi  wa Halmashauri  ya Wilaya ya Mbinga Joseph Rwiza  kwa kusimamia  utekelezaji wa ujenzi wa jengo la Makao Makuu ya Halmashauri  pamoja na ujenzi wa wodi tatu katika hospitali ya Halmashauri  ya Wilaya.

Pongezi hizo zimetolewa  tarehe  29 Mei 2024  katika ziara ya Mkuu wa Mkoa wa Ruvuma  kukagua utekelezaji wa  miradi ya maendeleo katika Halmashauri ya Wilaya ya Mbinga

 "Utekelezaji wa miradi unaridhisha nikupongeze Mkurugenzi maboresho madogo madogo ni kama kupanda miti ya matunda  miti ya kivuli ili eneo hili livutie" Amesema

Sambamba na pongezi hizo ametoa wito kwa Halmashauri  kuhakikisha miundombinu  hiyo inatunzwa vizuri na kusisitiza  kuwa Serikali imetoa fedha nyingi kwa ajili ya  utekelezaji wa miradi hiyo.

Kwa kipekee Kanali  Abbas  amempongeza  Kaimu Mkuu wa Divisheni ya  Miundombinu  na Maendeleo ya Vijiji na Miji Halmashauri  ya Wilaya ya Mbinga Bi. Neema Mbilinyi  kwa kusimamia utekelezaji  miradi, amemtaka kuendeleza  ari hiyo  ya kutekeleza miradi katika viwango bora.

" Mimi  binafsi nina farijika sana nikikuta Mhandisi  anaesimamia ujenzi  ni mwanamke, umefanya kazi nzuri inaonekana  endeleza hiyo ari ya uwajibikaji  na uzalendo" Amesisitiza

Ujenzi wa jengo la makao Makuu ya Halmashauri umegharimu  shilingi  Bil 3.3  hadi kukamilika na ujenzi wa wodi tatu utagharimu  shilingi 500,000,000 hadi kukamilika.

Halmashauri  ya Wilaya ya Mbinga inaendelea kumshukuru Rais wa Jamhuri ya Muungano wa Tanzania Mhe. Dkt. Samia Suluhu Hassan  kwa kutoa fedha kwa ajili ya utekelezaji  huo ambao unakwenda kuleta tija kwa wananchi.