MBINGA YAPINGA VITENDO VYA UKATILI WA KIJINSIA NA UKATILI DHIDI YA WATOTO

Tarehe ya kuwekwa: November 30th, 2022

Timu ya uelimishaji jamii juu ya vitendo vya ukatili na unyanyasaji wa kijinsia wilaya ya Mbinga leo Novemba 30 imeshiriki kwa vitendo Kampeni ya Siku 16 za Kupinga Ukatili wa Kijinsia na Ukatili Dhidi ya Watoto kwa kutoa elimu kwa umma kupitia Redio Ruvuma FM na Redio Hekima FM.

Pamoja na utoaji wa elimu kwa umma kupitia vipindi vya redio timu hiyo imefanikiwa pia kuwatembelea na kuzungumza na wanafunzi wa Shule ya Msingi Kiwanjani na Shule ya Sekondari Ruhuwiko juu ya athari mbalimbali za vitendo vya unyanyasaji na ukatili dhidi ya watoto na namna watoto hao wanavyoweza kusaidia kupambana na vitendo hivyo kwa kuripoti matukio yanayotokea kwenye ngazi na mamlaka zinazohusika katika maeneo yao.

Timu hiyo iliyoundwa kuratibu kampeni hii ya kupinga vitendo vya ukatili inajumuisha Maafisa Maendeleo na Ustawi wa Jamii kutoka Halmashauri za Wilaya na Mji wa Mbinga, Maafisa wa Dawati la Jinsia Kituo cha Polisi Wilaya ya Mbinga pamoja na wadau mbalimbali wakiwemo taasisi ya SMAUJATA.

Imetolewa na 

Kitengo cha Mawasiliano Serikalini 

Halmashauri ya Wilaya ya Mbinga 

Tarehe 30 Novemba, 2022