MIL 710 KUIMARISHA HUDUMA ZA AFYA KITUO CHA AFYA KINDIMBACHINI

Tarehe ya kuwekwa: October 24th, 2023

Na Silvia Ernest

Serikali kupitia Wizara ya Afya imesema kuwa ndani ya mwezi mmoja Kituo cha Afya Kindimbachini kilichopo Halmashauri ya Wilaya ya Mbinga Mkoani Ruvuma kitapokea  vifaa tiba  vyenye thamani ya shilingi Milioni 710  ili  kuboresha na kuimarisha utoaji wa huduma za afya kituoni hapo

Kauli hiyo imetolewa na Naibu Waziri wa Afya Dkt.  Godwin Mollel katika uzinduzi wa Kituo cha Afya Kindimbachini  kilichopo katika Kata ya Muungano  Halmashauri ya Wilaya ya Mbinga, Mkoa wa Ruvuma

Dkt. Mollel ameeleza kuwa Serikali ya Jamhuri ya Muungano wa Tanzania chini ya Uongozi imara wa Rais Samia Suluhu Hassan imeendelea kuboresha utoaji wa Huduma za afya nchini  kwa kuhakikisha vituo vya kutolea huduma za  afya vinakuwa na miundombinu bora, vifaa tiba na vitendanishi, dawa pamoja na uwepo wa wataalamu wa Afya.

Aidha amewapongeza wananchi wa Kata hiyo kwa kuchangia  shilingi Millioni 22 kwaajili ya ujenzi wa  Kituo cha  Afya pamoja na shilingi  Millioni 9 kwaajili ya ujenzi wa nyumba za watumishi wa Afya.

"Niwapongeze sana wananchi wa kata ya Muungano kwa kuunga mkono serikali ya Dkt. Samia Suluhu Hassani katika kuleta maendeleo ili kuhakikisha afya zenu na watanzania kwa ujumla zinakuwa salama”, Amepongeza Dkt. Mollel

Pia ametoa wito kwa wananchi hao kuendelea kushirikiana na  Rais wa Jamhuri ya Muungano wa Tanzania Mhe. Samia Suluhu Hassan katika kuleta maendeleo nchini ili kuweka mazingira rafiki kwa vizazi vya badae.

Kwa upande wake Diwani wa Kata ya Muungano, Mhe. Paulo Kayombo  ameishukuru Serikali ya Awamu ya Sita chini ya Uongozi makini wa Dkt. Samia Suluhu Hassan kwa kuendelea kuimarisha utoaji wa huduma bora za Afya  kwa wananchi.

Mhe. Kayombo amesema kuwa awali wananchi walilazimika kusafiri umbali mrefu kufuata huduma za afya  katika vituo vingine jirani hususani wakina mama wajawazito walipata wakati mgumu wakati wa kujifungua.