MWENGE WA UHURU WAHITIMISHA MBIO ZAKE RUVUMA, WAKABIDHIWA NJOMBE

Tarehe ya kuwekwa: April 25th, 2023

Mwenge wa Uhuru umekabidhiwa Mkoa wa Njombe leo Aprili 25, 2023 ukitokea Wilaya ya Nyasa baada ya kuhitimisha mbio zake Mkoani Ruvuma.

Akimwakilisha Mkuu wa Mkoa wa Ruvuma Kanali Laban Thomas, Katibu Tawala Mkoa wa Ruvuma Stephen Ndaki ameukabidhi Mwenge wa Uhuru kwa Katibu Tawala Mkoa wa Njombe Bi. Jodica Omary ambaye pia amemwakilisha Mkuu wa Mkoa wa Njombe, Antony Mtaka.

Sherehe za makabidhiano ya Mwenge huo wa Uhuru zimefanyika Kijiji cha Ngelenge kilichopo tarafa ya Ruhuhu Halmashauri ya Wilaya ya Ludewa, takribani kilometa 8 kutoka daraja la mto Ruhuhu ambapo ni mpakani mwa Mkoa wa Ruvuma na Mkoa wa Njombe.

Mwenge wa Uhuru ulipokelewa Mkoani Ruvuma tarehe 17 Aprili 2023 katika kijiji cha Sautimoja Wilayani Tunduru ukitokea Mkoa wa Lindi na kukimbizwa kwenye Wilaya 5 na Halmashauri 8 ambapo ulihitimisha mbio zake jana Aprili 24 Wilayani Nyasa.