NDUMBARO AWATAKA WASHIRIKI WA MKUTANO KUWA MABALOZI WA MRADI WA LTIP

Tarehe ya kuwekwa: July 18th, 2023

Akimwakilisha Mkuu wa Wilaya ya Mbinga,  Katibu Tawala wa Wilaya ya Mbinga  Ndg. Pendo Ndumbaro amewataka washiriki wa Mkutano wa wadau wa  kujadili mpango wa matumizi ya ardhi katika Halmashauri ya Wilaya ya Mbinga kuwa mabalozi wa mpango huo katika maeneo yao ili kuhamasisha ushiriki wa wananchi wakati wa utekelezaji.

Ndumbaro ametoa wito huo 18 Julai 2023 katika Mkutano wa  Wadau wa kujadili  mpango wa  matumizi  ya ardhi  katika Halmashauri ya Wilaya ya Mbinga uliofanyika katika  Shule ya Sekondari Kigonsera.

" Mradi huu umekuja katika Halmashauri yetu ni wa kwetu  utekelezaji wa mradi huu unatuhitaji sisi wananchi nitoe wito kwenu washiriki wa mkutano huu mkawe mabalozi katika maeneo yenu" Amesisitiza Ndumbaro

Amesisitiza kuwa  lengo la mradi huu ni kuwezesha umilikishwaji wa ardhi kwa wananchi pamoja  na kudhibiti kuongezeka kwa migogoro  miongoni mwa watumiaji wa ardhi hivyo ushiriki wa wananchi ni muhimu katika kufanikisha utekelezaji.

Naye Kaimu Mkurugenzi wa Halmshauri ya Wilaya ya Mbinga Ndg. Andrew  Mbunda ameishukuru Serikali kwa ajili ya utekelezaji wa mpango wa matumizi ya ardhi katika Halmashauri ya Wilaya ya Mbinga ambao unatekelezwa kupitia Mradi wa Uboreshaji Usalama wa Milki za ardhi ( LTIP).

Amehaidi kusimamia utekelezaji huo kikamilifu ili kuwanufaisha  wananchi wa  Halmashauri ya Wilaya ya Mbinga.