RAIS SAMIA AMEWEKEZA ZAIDI YA BIL.4 SEKTA YA AFYA MBINGA

Tarehe ya kuwekwa: October 22nd, 2023

Naibu Waziri wa Afya Dkt.  Godwin Mollel amebainisha  kuwa katika Halmashauri ya Wilaya ya Mbinga Rais wa Jamhuri ya Muungano wa Tanzania Mhe. Samia Suluhu Hassan amewekeza zaidi ya Bilioni 4  katika kuhakikisha wananchi  wanapata huduma bora za afya.

Dkt. Mollel amebainisha hayo  22 Oktoba 2023  alipomwakilisha  Makamu wa Rais wa Jamhuri ya Muungano wa Tanzania Mhe. Philip Isdor Mpango katika Uzinduzi wa Chuo cha Afya Litembo kilichopo  katika Halmashauri ya Wilaya ya Mbinga.

Aidha katika kuendelea kuimarisha ushirikiano kati ya Serikali na Sekta binafsi Mhe. Rais  amekuwa kiunganishi kikubwa  katika kuhakikisha sekta binafsi zinatimiza azma ya Serikali ya  kutoa  huduma bora kwa wananchi wote wa Tanzania.

“Leo nipo hapa Litembo katika uzinduzi wa Chuo cha Afya Litembo hii ni sehemu moja wapo ya Serikali kuendelea kuimarisha mashirikiano na Sekta binafsi nchini ili kuleta maendeleo kwa Taifa”, ameeleza Dkt. Mollel

Kwa upande wake Mkuu wa Wilaya ya Mbinga, Mhe. Aziza Mangosongo amesema chuo cha afya Litembo kitakuwa msaada mkubwa sana kwa wananchi wa mkoa wa Ruvuma na jirani kwani watazalisha wataalamu mbalimbali wa sekta ya afya watakaohudumu  katika vituo vya kutolea Huduma za afya nchini.