RC MPYA RUVUMA AANZA NA MIKAKATI HII KUBORESHA SEKTA YA AFYA

Tarehe ya kuwekwa: June 11th, 2021

Mkuu wa Mkoa wa Ruvuma, Mhe. Balozi Brig. Jen. Wilbert Ibuge ameazitaka Halmashauri zote mkoani Ruvuma kuhakikisha zinasimamia kikamilifu mpango wa uchangiaji wa huduma za afya kwenye zahanati, vituo vya afya na hospitali zote za serikali ili vituo hivyo viweze kutoa huduma bora za afya kwa wananchi.

Mkuu huyo wa Mkoa ameyasema hayo Juni 10, wakati alipokutana na viongozi na wasimamizi wa huduma za afya kutoka Wilaya na Halmashauri zote za Mkoa wa Ruvuma kupitia kikao cha kujadili mfumo wa ugavi na usambazaji wa vifaa vya afya kilichofanyika kwenye ukumbi wa Manispaa Songea.

Akihutubia kikao hicho Brig. Jen. Ibuge amesema viongozi wote wanaosimamia upatikanaji wa dawa, vifaa tiba na vitendanishi kwenye vituo vyote vya kutolea huduma za afya vya umma wanapaswa kuwa na uwajibikaji wa pamoja katika uhamasishaji na usimamizi wa mapato ya afya kupitia Mfuko wa Taifa wa Bima ya Afya (NHIF), na Mfuko wa Afya ya Jamii ulioboreswa yaani iCHF.

Jen. Ibuge amesema vituo vingi vya kutolea huduma za afya vya umma vinashindwa kukusanya mapato ya kutosha hali inayopelekea vituo hivyo kushindwa kutoa huduma zilizo bora kwa wananchi, na hivyo ameagiza hadi kufikia Septemba Mosi, 2021 vituo vyote  vya kutolea huduma za afya vya serikali viwe vimefungwa mfumo maalum wa kukusanya mapato.

Ameongeza kuwa usimamizi mzuri wa vyanzo vya mapato kwenye sekta ya afya vina mchango mkubwa sana katika ukuaji na ukusanyaji wa mapato ya ndani (Council’s revenue collection), hivyo Halmashauri zote zinaelekezwa kusimamia kikamilifu ukusanyaji wa mapato yatokanayo na sekta ya afya ikiwemo michango ya wanachama wa Mfuko wa Taifa wa Bima ya Afya (NHIF), Mfuko wa Afya ya Jamii ulioboreshwa (iCHF) michango ya papo kwa papo (User fees) pamoja na ada na tozo za usafi wa mazingira.

Sambamba na hayo, Mkuu huyo wa Mkoa wa Ruvuma amesisitiza juu ya kufanyika kwa uhamasishaji mkubwa wa wananchi kujiunga na Mfuko wa Afya ya Jamii ulioboresha, iCHF kwani kwa kufanya hivyo wananchi watakua wamepunguziwa mzigo mkubwa wa gharama za matibabu huku akitoa taarifa kuwa hadi sasa ni kaya 11,820 tu kati ya kaya lengwa 180,085 ndio zimejiunga na mpango huu, sawa na asilimia 3.3

Hiki ni kikao cha kwanza kwa Mhe. Balozi Brig. Jen. Wilbert Ibuge tangu alipoteuliwa na Rais wa Jamhuri ya Muungano wa Tanzania, Mhe. Mama Samia Suluhu Hassan kuwa Mkuu wa Mkoa wa Ruvuma na kuchukua nafasi ya Bi. Christina Mndeme ambaye aliteuliwa kuwa Naibu Katibu wa CCM – Bara, ambapo ameweza kukutana na Wakuu wa Wilaya, Makatibu Tawala, Wakurugenzi na Wenyeviti wa Halmashauri, Waganga Wakuu, Maafisa Mipango, Waweka Hazina, Maafisa Maendeleo ya Jamii, Maafisa Ustawi na Wafamasia kutoka Wilaya na Halmashauri zote za Mkoa wa Ruvuma.

Imandikwa na

Salum Said

Afisa Habari, Mbinga D.C