RC RUVUMA AZINDUA OPERESHENI YA UWEKAJI ANWANI ZA MAKAZI NA POSTIKODI

Tarehe ya kuwekwa: February 14th, 2022

Mkuu wa Mkoa wa Ruvuma Brig. Jen. Balozi Wilbert Ibuge amezindua rasmi operesheni ya uwekaji wa anwani za makazi na postikodi itakayotekelezwa kwenye Wilaya na Halmashauri zote za Mkoa huo ndani ya kipindi cha mwezi mmoja na nusu ujao.

Operesheni hiyo imezinduliwa Jumatatu Februari 14 kwenye ukumbi wa Manispaa ya Songea na kuhudhuriwa na viongozi mbalimbali wa Wilaya na Halmashauri wakiwemo Wakuu wa Wilaya, Wakurugenzi wa Halmashauri, Wenyeviti wa Halmashauri na Meya wa Manispaa ya songea Wakuu wa Taasisi mbalimbali pamoja na wataalam wengine wa Halmashauri.

Akizungumza wakati wa uzinduzi wa anwani za makazi na postikodi kwenye Mtaa wa NMB na kukabidhi Kibao cha anwani kwa Meneja wa Benki ya NMB Tawi la Songea Mkuu huyo wa Mkoa wa Ruvuma amewaomba wananchi kushiriki kikamilifu kwenye operesheni hiyo ili maeneo yote ya mitaa na vitongoji yaweze kuainishwa na kuingizwa kwenye mfumo maalum utakaorahisha utambuzi wa maeneo hayo ambapo pia ametoa maelekezo kuwa zoezi hilo kwa Mkoa wa Ruvuma liwe limekamilika ifikapo Aprili 30, mwaka huu 2022.

“Wananchi wote wa Mkoa wa Ruvuma tunao muda mfupi usiozidi mwezi mmoja na nusu na tayari msingi wa kazi umeshafanyika; huu ndio wakati wa kushirikiana vizuri kugatua maeneo ya mitaa na vitongoji tuyaelekeze yaingizwe kwenye ramani ya Mkoa, nchi na dunia”. Amesema RC Ibuge.

Aidha, RC Ibuge amempongeza na kumshukuru Rais wa Jamhuri wa Muungano wa Tanzania Samia Suluhu Hassan na serikali yake kwa maono yake hasa kipindi hiki nchi ikiwa inaelekea kwenye zoezi muhimu la sensa ya watu na makazi na kuongeza kuwa maandalizi ya sensa kwa mwaka huu yatategemea kwa kiasi kikubwa ukamilifu wa zoezi la utambuzi wa anwani za makazi na postikodi.

Naye Mkurugenzi Mtendaji wa Halmashauri ya Wilaya ya Mbinga Juma Haji Juma akiwasilisha taarifa ya maandalizi ya utekelezaji wa zoezi hilo amesema tayari Halmashauri yake imeshatambulisha na kutoa elimu ya awali kwa Menejimenti ya Halmashauri (CMT), Madiwani, Kamati ya Usalama ya Wilaya na Watendaji wa Kata kupitia kikao cha Baraza la Madiwani cha tarehe 8 Februari, 2022 sambamba na kufanya uteuzi wa Mratibu wa Programu pamoja na Timu ya Ufuatiaji ngazi ya Halmashauri.

Imeandikwa na 

Salum Said, Songea Ruvuma

Tarehe 14 Februari, 2022