SERIKALI YAJIZA KUTATUA CHANGAMOTO YA KUKOSEKANA KWA UMEME VIJIJINI

Tarehe ya kuwekwa: October 11th, 2023

Na Silvia Ernest

Serikali ya awamu ya sita inayoongozwa na Mhe.Dkt. Samia Suluhu Hassan imejizatiti katika kuhakikisha inaondoa kabisa  changamoto ya kukosekana  kwa  umeme hapa nchini, kuanzia katika ngazi ya Kijiji, Kata, Wilaya,Mkoa na Taifa kwa ujumla.

Kauli hiyo imebainishwa na Naibu Waziri wa Nishati Mhe.  Judith Kapinga  Oktoba 10, 2023  katika  hafla ya uwashaji umeme iliyofanyika katika Zahanati ya Lundumato katika Kata ya Ukata.

Amesema“Serikali ya Awamu ya Sita, imejizatiti katika kuhakikisha tunaondoa changamoto ya umeme hapa Ukata, jimbo lote la Mbinga Vijijini lakini kwa wilaya yote ya Mbinga na mkoa wote wa Ruvuma"

Ameendelea kumefafanua kuwa  katika Kata ya  Ukata kati ya Vijiji vinne vya Litoho, Liwanga, Ukata na Ulima, Vijiji vitatu vimeshapata umeme na Kijiji kimoja kilichobaki kitapata umeme kabla mwaka 2023  haujaisha.

Akitoa taarifa ya utekelezaji wa Mradi wa REA awamu ya tatu mzunguko wa pili  Mhandisi Evance Kabingo ameeleza kuwa kiasi cha shilingi  Bil. 1.19 zimetengwa  kwa ajili ya kutekeleza mradi wa usambazaji wa umeme katika vijiji vinne vya Ukata, vijiji vitatu vimeshafikiwa na miundombinu ya umeme na kijiji kimoja utekelezaji unaendelea.

Utekelezaji wa usambazaji wa umeme  unafanyika kupitia Mradi wa Kupeleka Umeme Vijijini Awamu ya Tatu, Mzunguko wa Pili chini ya Wakala wa Nishati Vijijini (REA).