SHILINGI BIL.28.8 KUPELEKA UMEME VIJIJI VYA MBINGA

Tarehe ya kuwekwa: October 9th, 2023

Na Silvia Ernest

Mwakilishi wa Mkurugenzi Mkuu wa Wakala wa Nishati Vijijini (REA), Mhandisi Yusuph Ismail ambaye pia ni Meneja Uthibiti na Ufuatiliaji wa Miradi REA amebainisha kuwa Serikali imetoa  fedha kiasi cha  shilingi Bilioni 28.8 kwa ajili ya kupeleka umeme  katika  Vijiji vyote ambavyo bado havijavikiwa na umeme vilivyopo katika Wilaya ya Mbinga.

Amefafanua kuwa katika fedha hizo Halmashauri ya Wilaya ya Mbinga imepata shilingi Bil.19.8 na Halmashauri ya Mji Mbinga  imepata shilingi Bil.9.

Mhandisi Ismail amebainisha hayo Oktoba 9, 2023  katika ziara ya Naibu Waziri wa Nishati Mhe. Judith Kapinga ndani ya viunga vya  Halmashauri ya Wilaya ya Mbinga.

Ameeleza  kuwa katika Halmashauri  ya Wilaya ya Mbinga jumla ya Vijiji 74  ambavyo havikufikiwa na umeme vitafikiwa na umeme  kabla ya Desemba  30, 2023 ambapo hadi kufikia leo Oktoba 9, 2023  tayari Vijiji 29 vimefikiwa na umeme huku Vijiji 45  vikiwa katika hatua ya utekelezaji.

Kwa Upande wake Mkurugenzi wa Halmashauri ya Wilaya ya Mbinga Ndg. Juma Haji Juma ametoa wito kwa Wakala wa Nishati Vijijini ( REA ) kuimarisha usimamizi katika  utekelezaji huo ili ukamilike kwa wakati na kuwanufaisha wananchi wa Halmashauri ya Wilaya ya Mbinga.

Amesema" Tunaishukuru Serikali  kwa kuona haja ya kuwafikia wananchi wa Halmashauri  ya Wilaya ya Mbinga, tusimamie utekelezaji huu ilinukalete tija kwa wananchi hasa katika shughuli za kiuchumi"