UWANJA WA AMANI MAKORO WAFAA MAONESHO YA NANENANE KIMKOA 2024

Tarehe ya kuwekwa: May 30th, 2024

Na  Silvia Ernest

Mkuu wa Mkoa wa Ruvuma Kanali Ahmed Abbas amethibitisha kuwa uwanja  wa maonesho  ya  Nane Nane Amani Makoro  uliopo  Kata ya Amani Makoro  Halmashauri ya Wilaya ya Mbinga unafaa kwa ajili ya maadhimisho ya sherehe za nane nane Mkoa wa Ruvuma kwa mwaka 2024.

Ameahidi  kwenda  kulifanyia  kazi ombi la Mkuu wa Wilaya ya Mbinga Mhe. Kisare Makori la kuomba  maadhimisho  hayo Kimkoa  yafanyike katika uwanja huo.

Hayo yamebainishwa tarehe 30 Mei 2024  katika  ziara ya Mkuu wa Mkoa  kutembelea na kukagua miundombinu ya  uwanja huo.

Aidha ameagiza  miundombinu  ya viwanja hivyo iendelee kuboreshwa ili kama itaamriwa maadhimisho  hayo yafanyike katika viwanja hivyo, tayari mazingira yawe rafiki.

"Viwanja hivi vinafaa nimengalia mazingira yapo rafiki na nimesikia ombi la Mkuu wa Wilaya la kuomba mwaka huu Kimkoa  maadhimisho  yafanyike katika eneo hili sasa nipeni  muda nikafanye maamuzi kati ya hapa na viwanja vya Sinai" Amesisitiza

Akisoma taarifa  Mkuu wa Idara ya Kilimo, Mifugo na  Uvuvi  Mhandisi  Evance Haule amesema  Uwanja huo ambao upo Kilomita 8  kutoka barabara  kuu ya Mbinga- Songea una ukubwa wa  ekari 18.8  ulitolewa na wananchi wa Kijiji cha Amani Makoro kupitia Serikali ya Kijiji  kwa ajili ya maonesho hayo.

Haule ameeleza kuwa  mpangilio wa matumizi  ya viwanja katika eneo hilo unahusisha  viwanja vya mabanda  ya maonesho ya kilimo na mifugo, Wajasiriamali, Huduma za kijamii,Taasisi za Serikali  na binafsi, Bustani, Maegesho ya magari, Uwanja wa mikutano, Eneo la burudani pamoja na matumizi mengineyo.