VIJIJI VYA MBINGA KUFIKIWA NA UMEME KABLA YA DESEMBA 30

Tarehe ya kuwekwa: October 8th, 2023

Naibu Waziri wa Nishati, Mhe. Judith Kapinga amewahakikishia wananchi wa Wilaya ya Mbinga  ambao Vijiji vyao bado havijafikiwa na umeme kuwa  Vijiji hivyo vitapata  umeme kabla ya  Desemba 30, 2023.

Kapinga amebainisha  hayo  Oktoba 8, 2023 katika  hafla ya uwashaji umeme kupitia Mradi wa REA awamu ya Tatu, Mzunguko wa Pili katika Kijiji cha Litumbandyosi, kilichopo Kata ya Litumbandyosi, Wilaya ya Mbinga mkoani Ruvuma.

Amesema “Mhe. Rais ametoa fedha mpate umeme,  Niwahikikishie ndugu zangu wa  umeme unakuja, tutamsimamia Mkandarasi kuhakikisha nguzo zinakuja na umeme unawaka"

Amefafanua  zaidi  kuwa Rais wa Jamhuri ya Muungano wa Tanzania Mhe. Dkt Samia Suluhu Hassan ametoa fedha ili kuwezesha utekelezaji  huo kwa Vijiji vyote nchini.

Vilevile amesema kuwa Serikali itapeleka umeme katika maeneo yote yenye shughuli za kijamii na kiuchumi kupitia mradi wa kupeleka umeme kwenye huduma za kijamii, zikiwemo shule, vituo vya afya, misikiti, makanisa na visima vya maji.

Kwa upande wake Mwakilishi wa Mkurugenzi Mkuu wa Wakala wa Nishati Vijijini (REA), Mhandisi Yusuph Ismail ambaye pia ni Meneja Uthibiti na Ufuatiliaji wa Miradi REA amesema Wilaya ya Mbinga imepewa shilingi Bilioni 28.8 kwa ajili ya kupeleka umeme vijiji ambavyo bado havijavikiwa na umeme.