WAFANYABIASAHA WA MAZAO MBINGA WAPEWA ANGALIZO

Tarehe ya kuwekwa: July 5th, 2024

WAFANYABIASHARA WA MAZAO  MBINGA DC WAPEWA ANGALIZO

Na Silvia Ernest

Wafanyabiashara wa mazao Halmashauri  ya Wilaya ya Mbinga wametakiwa kufuata taratibu zilizopo wakati wa  kusafirisha mazao  ili kuepuka usumbufu  pamoja na adhabu ya  kulipa faini pindi  watakapokiuka  taratibu zilizopo.

Rai hiyo imetolewa na Mkurugenzi  Mtendaji  Halmashauri ya Wilaya ya Mbinga Joseph  Kashushura  alipozungumza  na wafanyabiashara  hao Ofisi  kwake tarehe 4 Julai 2024.

Amesema " kuna baadhi ya wafanyabiashara hawafuati sheria zilizopo wakati wa kusafirisha mazao  kuna baadhi  hata leseni zimepita muda wake  sasa ili tuweze kwenda sawa lazima tufuate taratibu zilizowekwa"

Aidha amewataka wafanyabiashara hao kuendelea  kushirikiana na Halmashauri  ya Wilaya ya Mbinga kwa kutoa taarifa pindi wanapogundua wafanyabiashara ambao wanakiuka taratibu hatua ambayo itapelekea  kudhibiti upotevu wa mapato.

" Tuendelee kushirikiana haya mapato tunayokusanya ndio tunayotumia kutekeleza miradi yetu ya maendeleo sasa mtu anapofanya biashara kinyume na taratibu tutapata wapi hizo fedha" Amesisitiza

Kwa upande  wake Kaimu Mkuu wa Divisheni Viwanda na Biashara  na Uwekezaji  Martina Ngahy amewataka wafanyabiashara hao kulipa ushuru , kuwa na leseni hai pamoja na kibali  kutoka Halmashauri ya Wilaya ya Mbinga akisisitiza  kuwa ofisi yake ipo wazi kuwahudumia muda wote.

Nae  Msafiri Turo ambae ni mfanyabishara wa mazao  amemshukuru Mkurugenzi Kashushura kwa kukutana na wafanyabiashara hao  na kusisitiza kuwa hatua hiyo imesaidia kutatua changamoto kutoka pande zote mbili  huku akitoa wito vikao hivyo viwe endelevu.