WAFUGAJI WA KUKU WAKUMBUSHWA KUCHANJA KUKU

Tarehe ya kuwekwa: October 21st, 2023

Na Silvia Ernest,

Wafugaji wa kuku  Halmashauri  ya Wilaya ya Mbinga wamekumbushwa kuwachanja kuku  ili kuwakinga na magonjwa mbalimbali pamoja na kupunguza gharama za matibabu pindi  kuku wanapougua.

Wito umetolewa  tarehe 21 Oktoba  na Afisa Mifugo wa Halmashauri ya Wilaya ya Mbinga Bw. Haruna Masige  alipozungumza katika kipindi cha radio MBINGA YETU kinachorushwa na Radio Hekima.

 Amesema"kuanzia siku ya kwanza kifaranga  anapototolewa kinatakiwa kipate chanjo, katika umri huu wa siku moja  kifaranga huwa kinashambuliwa na ugonjwa unaitwa Mahepe"

Ameendelea kueleza kuwa katika siku ya 7 kuku anatakiwa apate  chanjo ya ugonjwa wa Gumboro  ambayo itarudiwa tena siku ya 21.

Siku ya 14  kuku anatakiwa apate chanjo ya ugonjwa wa  Mdondo maarufu kama Kideri ambayo itarudiwa tena siku ya 30, kuku akiwa na umri wa miezi 2 hupewa chanjo ya ndui.

Pamoja na  hayo Masige amewakumbusha wafugaji  kuzingatia usafi katika banda  la kufugia  kuku na mazingira yake pamoja na  usafi wa vyombo  vya kulishia ili kudhibiti kuenea kwa magonjwa.

Kwa elimu na taarifa mbalimbali usikose kuwasikiliza wataalam kutoka Halmashauri ya Wilaya ya Mbinga kupitia Radio Hekima  kila jumamosi kuanzia saa sita hadi saa saba mchana.