"WAGANGA WAFAWIDHI SIMAMIENI UKUSANYAJI WA MAPATO" MKURUGENZI RWIZA

Tarehe ya kuwekwa: March 26th, 2024

Mkurugenzi  Mtendaji wa Halmashauri ya Wilaya ya Mbinga Joseph Rwiza amewataka waganga wafawidhi  wa vituo vya kutolea huduma za afya kutekeleza  majukumu yao ya kuwahudumia wananchi sambamba na kusimamia ukusanyaji wa mapato katika maeneo yao.

Rwiza ametoa agizo hilo  tarehe 26 Machi 2024 katika kikao chake na  timu ya uendeshaji wa huduma za afya pamoja na waganga wafawidhi wa vituo vya kutolea huduma za afya Halmashauri ya Wilaya ya Mbinga.

"Mwenendo wa  ukusanyaji wa mapato hauridhishi  kuna vituo ambavyo vina alama  nyekundu hapa  hakikisheni mnatimiza wajibu wenu na nyie ambao mnafanya vizuri endelezeni ari hiyo tukikutana tena nataka nione mabadiliko"  Amesema 

Aidha amewataka viongozi hao kuhakikisha  wanaimarisha ulinzi na usalama  pamoja na kuzingatia usafi wa mazingira katika maeneo yao akisisitiza kuwa mazingira safi ni moja wapo ya tiba kwa wagonjwa wanaokwenda  kupata huduma katika vituo hivyo.

Kwa upande mwingine ameitaka timu ya uendeshaji wa huduma za afya Halmashauri ya Wilaya ya Mbinga kusimamia na kufanya ufuatiliaji  katika vituo vya kutolea huduma za  afya ili kuimarisha utoaji wa huduma bora za afya  kwa wananchi.

Kwa kipekee Mkurugenzi Rwiza ametoa pongezi kwa Zahanati ya  Kigonsera kwa kusimamia vizuri ukusanyaji wa mapato yatokanayo na huduma ya bima  ya CHF,  amewataka  washiriki wa kikao wengine kuiga mfano huo katika maeneo yao.

Naye  Kaimu Mganga Mkuu wa Halmashauri ya Wilaya ya Mbinga George Mhina ameeleza kuwa katika  mwaka wa fedha 2024/2025 Halmashauri imetenga fedha kwa ajili ya ununuzi wa vishikwambi ambavyo vitatumika katika  kukusanya mapato  kwa kutumia mfumo wa kieletroniki wa GoT-HoMIS.

Ameeleza kuwa hatua hii itasaidia kuondoa udanganyifu na  mianya ya upotevu wa fedha katika vituo hivyo.

Imeandikwa na Silvia Ernest

Kitengo cha Mawasiliano Serikalini