WALIMU MBINGA DC ZINGATIENI MAFUNZO MTAALA MPYA" MBUNDA

Tarehe ya kuwekwa: March 1st, 2024

Kaimu Mkurugenzi Halmashauri ya Wilaya ya Mbinga  Andrew Mbunda amewataka walimu wanaojengewa uwezo  wa mtaala mpya wa elimu msingi  kushiriki mafunzo hayo kikamilifu pamoja na kuzingatia maelekezo yanayotolewa na wawezeshaji.

Mbunda ametoa rai hiyo tarehe 1 Machi 2024  wakati akizungumza na baadhi ya walimu wanaojengewa uwezo  katika moja ya  kituo cha mafunzo kilichopo Kata ya Maguu.

Amebainisha kuwa mafunzo haya ni moja ya utekelezaji unaofanywa na Serikali wenye lengo la  kurahisisha utekelezaji wa mtaala huo ambao umeanza kutekelezwa rasmi mwezi Januari 2024.

" Kupata mafunzo ni jambo moja na kuyafanyia kazi mafunzo hayo ni jambo jingine tukayatumie mafunzo haya ili kuleta tija katika shule zetu kama ilivyo azma ya Serikali" Amesisitiza

Naye Afisa elimu awali na  msingi  Mwl.Veronica Justine  amebainisha kuwa sambamba na mafunzo hayo tayari Halmashauri ya Wilaya ya Mbinga imepokea  vitabu vya mtaala mpya  wa elimu vitakavyotumika kufundishia wanafunzi wa  darasa la awali, la kwanza pamoja na darasa la tatu.

Ameongeza kuwa  mtaala huo umezingatia nadharia za ukuaji na ujifunzaji na falsafa ya elimu ya kujitegemea inayosisitiza elimu ya kumuwezesha mtanzania ajitegemee na amudu maisha yake ya kila siku.

Imeandikwa na Silvia Ernest 

Kitengo cha Mawasiliano Serikalini 

1 Machi, 2024