WANA MUUNGANO WAMSHUKURU RAIS SAMIA UJENZI WA SEKONDARI

Tarehe ya kuwekwa: August 13th, 2024

WANA MUUNGANO WAMSHUKURU RAIS SAMIA UJENZI WA SEKONDARI

Na Silvia Ernest

Wananchi wa vijiji vya Kindambachini, Kizota na Kimara   vilivyopo Kata ya  Muungano  Halmashauri ya Wilaya ya Mbinga wanamshukuru Rais wa Jamhuri ya Muungo wa Tanzania Mhe. Dkt Samia Suluhu Hassan kwa  ujenzi wa shule mpya ya Sekondari  ambayo itawaondolea adha wanafunzi  kutembea zaidi ya kilomita 10 kwenda katika  shule ya Sekondari  iliyopo  Kata ya jirani.

Wameahidi kutoa ushirikiakiano katika utekelezaji huo ili kuhakikisha ujenzi huo unakamilika kwa wakati ili shule hiyo ifunguliwe mwezi Januari 202.

Hayo yamebainishwa na Diwani wa Kata hiyo Mhe. Paul Kayobo alipozungumza kwa niaba ya wananchi hao tarehe 13 Agosti 2024.

“Tunamshukuru Rais wetu kwa kutuletea hizi fedha kwa ajili ya ujenzi wa Sekondari  ya Kata ya Muungano  tulipokea maelekezo kutoka kwa wataalam kutoka Halmashauri na baadhi ya maelekezo tumeshayatekeleza” Amesema Mhe. Kayombo

Wananchi hao tayari wameshashughulikia changamoto ya upatikanaji wa maji ambayo yatatumika katika utekelezaji huo pamoja na kufanya usafi katika eneo ambalo itajengwa shule hiyo na kuahidi kutoa nguvu kazi ili kupunguza gharama za utekelezaji.

Kwa upande wake Afisa Elimu wa  Sekondari Halmashauri ya Wilaya ya Mbinga   Felix Danda amebainisha kuwa mkakati wa Serikali ni kuhakikisha kila Kata inakwa na  shule ya Sekondari.

Ameeleza kuwa kwa upande wa Halmashauri ya Wilaya ya Mbinga kati ya Kata 29 kata 3 tu   hazina shule ya Sekondari ikiwemo Kata ya Muungano  ambayo tayari kiasi cha shilingi 560,552,827  kimepokelewa  kwa ajili ya kuanza ujenzi wa Sekondari.