WANANCHI MBINGA DC WAHIMIZWA KUMEZA KINGA TIBA ZA USUBI

Tarehe ya kuwekwa: August 18th, 2023

Wananchi wa Halmashauri ya Wilaya ya Mbinga wahimizwa kumeza Kinga Tiba  za Usubi ili kutomeza magonjwa yasiyopewa kipaumbele  ya  kichocho, matende na mabusha, minyoo  pamoja na  usubi.

Rai hiyo imetolewa na Mratibu wa  magonjwa  yasiopewa kipaumbele  kutoka Halmashauri ya Wilaya ya Mbinga  Joseph Washa Washa  wakati wa ufunguzi wa zoezi la umezaji  Kinga Tiba  za Usubi tarehe 17 Agosti 2023 uliofanyika katika Kijiji cha Burma.

Amesema kuwa  kila mwananchi mwenye umri kuanzia miaka 5 na kuendelea  isipokuwa mjamzito pamoja na mgonjwa mahututi  anatakiwa kumeze dawa hizo ili kuwa salama.

 Amebainisha kuwa bado jamii haina elimu ya kutosha juu ya faida za Kinga Tiba hizo na  baadhi ya wanafamilia wamekuwa wakiwafukuza  watoa huduma  wanaopita  katika Kaya zao  kwa lengo la kuwapatia  dawa hizo muhimu kwa afya zao.

" Tukiongelea ugonjwa wa Usubi  tuna watu wetu ambao wanao lakini bado hatuna elimu  ya kutosha, mfano dalili za usubi ni pamoja na kuwasha mwili, kua na uoni hafifu na kuwa na mabaka mabaka kwenye ngozi zetu" Amebainisha Washa Washa

Amebainisha kuwa  kwa mwaka  2022/2023 Halmashauri ya Wilaya ya Mbinga  imeweza kuwafikia  wanajamii na kuwapatia kinga tiba ya usubi  kwa asilimia 84%  ikiwa  walengwa  walikuwa 283,531 na walifikiwa ni 237,249.

Washa Washa amebainisha madhara yatokanayo na ugonjwa wa usubi ni  kusababisha upofu pamoja na kupunguza nguvu kazi katika  utekelezaji wa shughuli za kiuchumi.